الرئيسية - رفع الصور والملفات - ألعاب - دروس - خطوط - اتصل بنا - أعلن معنا
| | الرئيسية - رفع الصور والملفات - ألعاب - دروس - خطوط - اتصل بنا - أعلن معنا |
| |
|
#1
21-09-2008, 12:11
| |||
| |||
 ازاى احب كلية الهندسه؟؟ بسم الله الرحمن الرحيم اولا اسفه لناس كتير هتقول ان الموضوع هايف جدا وكده بس والله الموضوع ده مهم جدا بالنسبالى واسفه لكل المهندسين ال بيحبوا وبيعشقوا كلية الهندسه انا حبيت بس افضفض معاكوا ياعمالقه لانى والله تعبانه جدا نفسى بجد احب كلية الهندسه بس مش عارفه احبها ليه بصوا عارفه انكوا مستغربين بس انا هوضح اكتر انا اولا لسه اصلا داخله اعدادى هندسه وحضرت كمان محاضره واحده الدكتور مداش حاجه بس فضل يدردش ع النظام وكده المهم ان وسط كلامه قال انا عايز اسالكم انت دخلت هندسه ليه وفضل يقول بعضكم هيقول مجموعى جابنى هنا او عشان اهلى كده يعنى انا بردو سالت نفسى نفس السؤال ولقيت انى معنديش اى طموح ف هندسه الا انى انجح وخلاص واتخرج واقعد ف البيت انا ال مضايقنى انى دايما كنت طموحه وبتحدى اى حاجه عمرى ما مشيت مع الجو وخلاص ف اولى ثانوى كنت مشتركه ف حاجه زى صناع الحياه وكنت بحب قوى دايما يبقى ليا هدف وبعد تانيه ثانوى كانت اكبر مشكله انى مدخلتش علمى احياء كنت بحس ان الكليات الطبيه دى جزء من روحى كنت بقول لما ادخل طب مثلا اقدر اعالج الناس اقدر اخدمهم واكسب رضا ربنا بس انا محبتش اقف و طبعا دخلت رياضه ومن ثم هندسه وده طبعا بفضل ربنا وانا راضيه بقضاء ربنا ومؤمنه بيه والحمد لله بس كنت عايزه حد يحببنى بجد ف الكليه ازاى يبقى عندى طموح واقدر اعمل ايه لدينى بتمنى انكوا تفهمونى ومحدش يستحقرنى بس انا عايزه احب الكليه بجد عشان ميكنش طموحى مجرد النجاح لا انجح وباعلى تقدير واقدر اختار القسم ال ادخله مش ادخل اى قسم وخلاص فى الاخر بتمنى انكوا تفيدونى وربنا يجزيكم خير اسفه للتطووووووويل ازاى احب كلية الهندسه؟؟
 |
|
21-09-2008, 03:25
| رقم المشاركة : [2] | |
| : : عملاق ذهبي : : 
| رد: ازاى احب كلية الهندسه؟؟ ياااااااااااااه يا سكره انتى شايله فى قلبك كل ده وساكته  انا حاسس انى عايز اعيط  انتى بتتكلمى عن كليه الهندسه كما لو كانت معتقل وبعدين من دلوقتى وبتقولى الكلام ده دانتى لسه فى اعدادى مش عاوز كلامك ده ياثر عليكى سلبيا فى الكليه لان كرهك وخوفك من الكليه اكيد هياثر عليكى لانك علشان تتمى اى عمل بنجاح للنهايه لازم تكونى بتحبى العمل ده انتى لازم تحبى الكليه انتى هتشوفى حجات غريبه فى الكليه وهتتعبى اكيد وهتشيلى الهم كتير بس عادى والله عادى كل سنه بتعدى وربنا هو الى بيوفق انا كل سنه كده بردو زيك لدرجه انى مش عاوز اروح الكليه خالص كرهت الدكاتره وكرهت المعيدين وكرهت الدفعه بتاعتى وكرهت مبنى الكليه والارض الى بمشى عليها فى الكليه بس انا انا ناوى ان شاء الله لما انزل الكليه لازم استعد نفسيا واحسس نفسى انى سعيد وانا نازل الكليه وانا ماشى فى الشارع كده هوهم نفسى انى مبسوط وهطرح سؤال على عقلىىى انا ليه مبسوط؟ عقلى هيرد يقولى انتا مبسوط علشان رايح الكليه لازم اوهم نفسى بكده انى سعيد ومفيش اى مشاكل فى الكليه بالنسبه لموضوع القسم ده لسه بدرى اوى يعنى انتى لسه من خلال دراستك هتحددى ميولك فى الكليه وتشوفى القسم الى متناسب مع طموحك واهدافك عموما عاوز اقولك انك مش لازم تخرجى فاهمه كل حاجه من المحاضره بس المهم تركزى فى المحاضره دى ومتلكلميش زمايل وركزى اوى مع الدكتور الدكتور احيانا بيرغى كتير اوى ......عادى وسعات يركز على حجات معينه بس هى الى بتيجى فى الامتحان لو فتحتى كتاب ومش فاهمه حاجه منه عادى جدا معظم الكتب مش بفتحها خالص متعقديش نفسك يعنى وعليكى وعلى ورق المعيدين بيبقى شرحه مبسط جدا والدكاتره بتركز على حجات بتيجى فى الامتحان احيانا ممكن تذاكرى طول السنه حجات وتضيعى وقت فيها ويكون نظام الامتحان مختلف خالص وملهوش دعوه بالى انتى ذاكرتيه لازم تشوفى امتحانات السنين الماضيه وانتى بتذاكرى علشان تعرفى طريقه وضع الامتحان وتعرفى بردو الدكتور بيفكر ازاى وتذاكرى على هذا الاساس حاولى تحببى نفسك فى الكليه ولازم تبقى عارفه انك مش لوحدك بس عندك مشكله اسالى زمايلك هيقولولك انهم حاسين انهم تايهين زيك بالظبط يعنى مش انتى بس انا كنت فى اعدادى هندسه حاسس انى تايه خالص بس الحمد لله عديت وجبت جيد كمان يعنى لاتستصعبى الامور واسف انا كمان على الاطاله بس كنت بنقلك خبرتى خبره 4 سنين فى الكليه انا دلوقتى اخر سنه بقااااا ربنا يوفق الجميع الى ما فيه الخير شكرا على الطرح ده كنت افضل كتابه الموضوع فى المنتدى الشامل واهلا بيكى فى المنتدى | |
| |
|
21-09-2008, 05:20
| رقم المشاركة : [3] | ||||||||||||||||||||
| : : مشرف قسم البرامج : :
| رد: ازاى احب كلية الهندسه؟؟ السلام عليكم ورحمة الله وبركاته . . بما انك طموحه جدا يبقى لازم تعرفى ان كلية الهندسه لها دور كبير جدا فى الحياه انا فاكر دكتور كان عميد الكليه سابقا قال جمله شهيره جدا وانا فى اعدادى والجمله هى " المهندسون هم بناة العالم " اذا زى ما الطب له دور فى الحياه اعتقد ان الهندسه لها الدور الاكبر فلو جينا ناخد مثال مثلا الطبيب بيكشف على المرضى بايه ؟؟ اكيد بأجهزه طبيه واللى صمم واخترع الاجهزه دى هم المهندسون طبعا دا تخصص هندسة الالكترونيات والهندسه الطبيه ولو جيتى تبصى فى اى حاجه حواليكى هتلاقى الهندسه لها وجود وبجد تقدم اى دوله هى بتطور مهندسيها والجمله دى قالها لنا احد الدكاتره المعروفين فى كلية التجاره عشان هو عارف اهمية المهندس فى الحياه .. وانا شخصيا لما كنت فى اعدادى كان جالى احباط كبير جدا لدرجة انى مش مستوعب ازاى هنجح السنه دى لكن مر الوقت واندمجت مع الكليه واتعرفت على اصدقاء جدد ومشى الحال تماما وعدت اعدادى ودخلت قسم اتصالات ودا كان طموحى من الثانويه العامه ...
كلية الهندسه فيها حوالى 20 قسم بتختلف طبعا من كليه لكليه وكل تخصص له مجال ودور كبير جدا فى الحياه هنمسك مثلا القسم بتاعى (هعمل دعايا بقى للقسم هههههههههه ) قسم الكترونيات واتصالات طبعا الكلام بيعبر عن نفسه لو انا فى البيت مثلا هلاقى عشرات الاجهزه الالكترونيه واجهزة الاتصالات زى التليفون والمحمول انا مثلا عشان ادخل المنتدى دخلته ازاى ؟ لازم يكون عندى كمبيوتر ودا جهاز الكترونى واللى صممه مهندسين طبعا ولازم يكون عندى انترنت واجهزة الانترنت زى الروتر والسويتش والكابل وكل دا من تصنيع المهندسين دا مثال بسيط برده لدور الهندسه فى حياتنا اختى سكره انتى لسه فى اول يوم وكلامك دا حاله طبيعيه بتحصل عند اى حد بس الاختلاف انك دخلتى كليه فى غير رغبتك لكن محصلش حاجه مش لازم تندمى وعسى ان تكرهوا شيئا وهو خيرا لكم وكليه الهندسه مش حاجه المفروض تكرهيها لازم تحبيها وان شاء الله هيحصل ولازم تعرفى ان احنا كمسلمين محتاجين اللى يفكر ويخترع حاجه جديده تفيد البلد مش كل حاجه هنجيبها من الدول الاجنبيه ونستخدمها وخلاص من غير مانعرف هى شغاله ازاى ؟؟ ليه منحاولش نعمل حاجه جديده ؟؟؟؟؟ انا بنصحك انك فى اعدادى تحاولى تتأقلمى مع الجو وان شاء الله دا هيحصل بعد ما تتعرفى عالنظام وتعرفى اصحاب جدد وبعد كدا قررى ايه القسم اللى يناسبك وان شاء الله بعد السنه دى هيكون عندك خلفيه كبيره جدااا عن الهندسه ووبقولك انك لازم من الاول تتابعى المناهج وتذاكرى عشان متتعقديش من المواد وتكرهيها وميكنش عليكى مجهود كبير ايام الامتحانات والتقدير فى الهندسه بالمتابعه اول باول اتمنالك التوفيق وان شاء الله فى يوم من الايام تيجى تقوليلنا مشروع التخرج بتاعك ايه زى منا النهارده لسه جاى من ساعات من الكليه وكنت بختار المشروع وحضرت محاضره من اولها كدا واهلا بيكى فى المنتدى | ||||||||||||||||||||
| |
|
21-09-2008, 08:08
| رقم المشاركة : [4] | |
| مهندس اتصالات 
| رد: ازاى احب كلية الهندسه؟؟ اقولك على حاجة حلوة اوى انا فى كلية الهندسة وقسم اتصالات , وفى اخر سنة كمان وبحب كلية الهندســـــــــــــــــــــــــــة جدااااااااااااااااااااااااااااا والغريب , انى قليل لما بروح الكلية , وقليل حضور المحاضرات , وقليل المذاكرة كمان متخيلة !! بس بحب الكلية جداً والله بصى بصى عايزة تحبى كلية الهندسة تخيلى نفسك كدا فى مرة دخلتى مشروع فى اى حاجة ,, وكنتى فاهماه كويس ,, وفاهمة كل حتة فيه ,, وبتشرحى لاصحابك اللى مش فاهمين !! هتلاقى نفسك تحبى العلم جداً وتحبى كليتك اللى أهلتك انك تعرفى العلم دا .. اقولك مثلا لما كنت باخد دورة gsm كنت فاهم كويس اوى ومبسووووووووووط اوى وانا فى الكورس وكنت عايز افضل حياتى كلها كدا ادرس واتعلم واذاكر وبس !! لأنى فاهم , بحس انى لما بتعلم , بقدر افسر التكنولوجيا الحديثة اللى بتحصل قدامك كل الناس عارفين ان فيه تكنولوجيا , بس مش عارفين ازاى اتعملت ؟ وليه التكنولوجيا بالكم دا بس ؟؟ ليه التكنولوجيا مش متقدمة عن كدا !! ليه التكنولوجيا بالسعر دا مثلا !! الناس مش عارفه بس انتى هتكونى عارفه عارفة ليه اسعار التكنولوجيا دى متفاوتة من حاجة لحاجة , عارفة ازاى التكنولوجيا دى قامت مثلا بتعرفى كل حاجة وبتبقى متابعة كل كبيرة وصغيرة فى التقنية اللى بتحصل حواليكى ودا سبب يخليكى الافضل بين غيرك ودا سبب يخليكى تحبى كليتك جداً سيبك من نظام التعليم المعقد فى الكلية , ولا سيما لو كنتى فى هندسة المنصورة سيبك من الدكاترة اللى مش بتعرف توصل المعلومة المهم انك بتحبى العلم نفسه وطالما وجد العلم ,, وجد العلماء بس كفاية عليكى كدا | |
|
| |
|
21-09-2008, 10:02
| رقم المشاركة : [5] |
| : : عملاق نشيط : :
| رد: ازاى احب كلية الهندسه؟؟ يا جمـــــــــــــــاعه سكره دى هتبقى زى السكره وهتجيب مجموع زى الفل كمان وهتخبط التقدير المتين ودلوقتى تقولوا انى قلت كدا هى بس بتقول الكلمتين دول علشان الحسد هههههههههههه متخافيش يا سكره الكليه دى مسكره وزى العسل اهم حاجه متسمعيش لكلام اى حد يعطلك عن اللى انتى عاوزاه يعنى متبصيش لغيرك من الفشله حددى هدف ادامك ولازم يكون كبير وحاولى توصلى له باى طريقه وبكل طريقه ولو موصلتيش له هتجيبى اللى اقل منه شويه يبقى مخسرتيش كتير لكن عمرك ما هتتضربى خالص يعنى حددى لنفسك امتياز واشتغلى على كدا لو ربنا قدرلك الامتياز يبقى خير وبركه ولو لم يقدر هتجيبى مش اقل من جيدجدا وعمرك يعنى ما هتشيلى مواد مثلا بعيد الشر يعنى سلام بقى رايح اصلى |
|
| |
|
22-09-2008, 10:49
| رقم المشاركة : [6] |
| : : عملاق جديد : :
| رد: ازاى احب كلية الهندسه؟؟ متشكره يا جماعه اولا لانكم فهمتونى وربنا يجزيكم خير و قد ايه انا حاسه انى معدش عندى كلام جنب خبراتكم وحبكم الجامد للكليه ويكفينى شرف طبعا انى ف كليه فى ناس بيحبوها كده وعايزه اقلكوا انكوا فعلا والله عمالقه ربنا يخليكوا لكل الناس انا فعلا اخترت الناس الصح والله كنت بفكر بعد ما جيت من الكليه اكلم مع مين وقلت مفيش غير العمالقه والحمد لله انكوا بجد مخيبتوش ظنى فيكم دايما والله متالقين |
|
| |
 |
| مواقع النشر (المفضلة) |
| الذين يشاهدون محتوى الموضوع الآن : 1 ( الأعضاء 0 والزوار 1) | |
| أدوات الموضوع | إبحث في الموضوع |
| انواع عرض الموضوع | |
|
|
المواضيع المتشابهه | ||||
| الموضوع | كاتب الموضوع | المنتدى | مشاركات | آخر مشاركة |
| تفتيش بنات كلية.... | قلب_الياسمين | منتدى القصص والحكايات | 18 | 07-06-2008 03:09 |
| الهندسه بالعربية لماذا لا تكون ؟؟؟؟ | Mahfouz | المنتدى الهندسى | 11 | 18-03-2007 02:02 |
| مواضيع كتيره فى علم الهندسه فى اقسام مختلفه......م/سندباد...طناح | Eng hossam | الهندسة المدنية | 3 | 06-03-2007 09:02 |
| ابتسم انت فى كلية الهندسه | ENG/A.S.A | فرفش نعنش | 19 | 26-12-2006 10:48 |
| ارشميدس شيطان الهندسه.... عبقرينو... | Mahfouz | المنتدى العلمى العــــام | 4 | 30-07-2006 09:17 |
شات سعودى - شات - تحميل صور - منتديات أبوويو |
العرض العادي
